Erribera Foru Erkidegoaren hegoaldean kokatzen da, Ebro ibaiak zeharkatuta Tuterako hiri monumentala du buru. Bere gastronomia finari esker nekazal lurralde hau Nafarroako baratzea bezala ezagutzen da; hemen ekoizten dira lehen kalitateko produktuak: Tuterako alkatxofak, zainzuriak eta pikillo piperrak besteak beste, ongi jatearen zaleen artean ospe handikoak.

Honetaz gain, paisaia ikusgarriak ditu eskualde honek, kontrastez beterik: soro ureztatuen oparotasunaren ondoan, Bardeetako erdi-basamortuko eremu zabal eta ederrak. Ibilbide anitzek zeharkatzen dute natur-gune hau, eta bisitariak dozenaka txoko interesgarri aurkitzeko parada izanen du.

Eskualdeko herri asko aipatu daitezke beren garrantzi historikoarengatik; kultura ezberdinak kokatu dira hemen historian zehar (kristaua, arabiarra, judutarra ...), eta denen artean kultura-gune erakargarri hauek osatu dituzte.